الليلة شوفتك ف المنام ماعرفتش اهرب من عينيك

الليلة شوفتك ف المنام
ماعرفتش اهرب من عينيك
الأرض وصلتنى بجدور
و الشمس صحت فيا نور
و السحاب مطّر ونس
وانا حد واخد ع الهروب
قضيت حياتي مرغمة
ماعرفش ليه من يوم لقاك
وانا تايهه فيا الأسئلة
اشمعنى انت؟ ؟
واشمعنى انا ؟؟
مين إللى واصل نبضنا جوا السما ؟ ؟
مين إللى طهر قلبنا ساعة الوصول
مين إللى وسع لك طريقي للقبول
مين عرفك طعم الأماني و وصفها
دلك عليا و دل روح الكون عليك
ماعرفش غير اتمد لك و اتمد فيك
ماعرفش غير انك أنا !!!
يا نخل طارح من سنين
واستنى ميلي عشان يميل
فتّحت عيني المرغمين المغرمين الطيبين الحالمين المشتاقين المهزومين المليانين طهر و أمل .
قربت لك قلبي اكتمل
و صالحت وياك الحياة
يا دفتي وقت الغرق
و كتفي لما الحمل زاد
أول بشاير ربنا لحب العباد

……

المرة دي شوفتك قوى
و لأول مرة باشوف وباحس
ولأول مرة المس تفاصيل الروح ف عنين
و اشعر بالنور من همس ايدين
و أتنفس شوق وغرام وحنين
ضاع مني سنين وانا عني باحيد
يصالحني وريد على نبض وريد
وانا قلبي بطبعه ياقلبي عنيد
إنما سلمت خلاص للقول
الأرض البور طرحت جنة
و ستاير شَعري بتتدلى
بتهفهف مع تنهيد الروح
و لأول مرة انا باعرف أبوح
مدبوح بيطبطب على مدبوح
وسامحني أنا ياما هزمت إيديك
رديت الحضن اللي سكني
صدقني ماحدش علمني
و لا كنت افهم طعم المشاوير
الخطوة ف بعدك كانت غير
و الشجر الطارح كان محني
ما شبكش الليل يوم فستاني
و لا مرة ندهته فناداني
غماني وضيع عنواني
و رماني بضعفي ف عز الخوف
و لأول مرة أنا باعرف أشوف
و لأول مرة أنا باعرف أحس
و النبض مابيني و بينك بس
من غير ما اتدارى ف احساسي
من غير ما اتكفى من الحيرة
من غير ما الغيرة تمزعني
العيب ع العمر اللي خدعني
و الصبر اللي نساني ف جوفه
العيب ع القلب اللي آمنته
و قابلتك لملم في كفوفه
و اشتاق لك فيما بينه وبيني
قال ايه بالهجر بيحميني
أتاريك بتنبت من طيني
و بتطرح شوقك من عيني
و بتحلم علشان أتمنى

قصيدة.. سمة_شعبان

٦ نوفمبر ٢٠٢١